انه يرتجف
ينتظر
يتحين الفرصه
هو حقا
يريد ان يثور
يقاوم ويقاوم
يحاول ان يفك القيود
يستعطفني احيانا
واحيانا يهددني

********

لم يعد يهداء
لا يجعلني انام
واذا نمت
يعاقبني
يتحكم بعقلي الباطن
يجعلني دائما اتذكرك
في ليلي وفي صباحي
في هدوئي وفي ثورتي

*********

فرض علي الوحده
وادخلني عالم من الهيام
من الاشتياق الدائم
لم يعد يذكر غيرك
والغريب
انه لم يعد يخاف الحب
يذكرني به طوال الوقت
وكاننا لم نعاني منه من قبل
يحاول ان يقنعني
بان الحب احساس جديد
للاسف
لم يعد قويا كما كان

********

فجاءه
نبضاته
استبدلها بحروف اسمك
يتغني بها
لتخترق وجداني
يردد دائما انه لا طاقه له
وانتي بعيده
لا وجود له بدونك

اذا رائيتك يدفعني بقوه
كي اقترب
يقودني الي حيث وجدتي
افقد السيطره عليه
اذا قاومته بكي
وادخل علي نفسي الحزن
حتي امتثل لاوامره

***********

اذا سلمتي
ترهق نبضاته صدري
واشعر بعظامي حوله
تنهار
اذا تكلمتي
يرقص طربا
يشعرني بالسعاده
يتغذي بكلماتك
كما يفعلها النحل مع رحيق الازهار
اذا ابتسمتي
ينتفض
يهزني بعنف
يتسع ليحتوي العالم كله

**********

اقول له
الم نكتفي بهذا القدر من الالم
الم نتعذب كثيرا
ونبكي بلا توقف
انسيت ايام الشقاء
والليالي التي متنا فيها الاف المرات
لقد اتفقنا الا نحب
الا نشتاق
الا نفكر حتي في الحب
الم نتعاهد علي ذلك
ايمكنك ان تنكر هذا

لما نمت حلمت حلم غريب
لقيت نفسي واقف في غرفه عمليات وفي جسد شكله غريب نايم علي سرير العمليات وحولين الجسد لقيت واحد لابس لبس دكتور ومعاه شويه ممرضين وواقف واحد عبيط شبهه اظن انه بيعلمه اصول الدكتاتوريه قصدي الدكتره (علي فكره الكيبورد من ساعت ما استخدمتها كمخده وهيا بقت تكتب لوحدها)
الدكتور راجل عجوز جدا ماسك المشرط بالعافيه قربت منه وبصيت في وشه لقيت نفسي اعرفه هو انت ورايا ورايا مش كفايه من ساعت ما انا اتولدت وانت بتحكم بلدي مردش عليا
لما قربت لقيت الجسد عليه علم مصر وعنده اصابه جامده في القلب والمخ لكن الغريب ان الدكتور كان قاعد يشرح في رجل الجسد والجسد بيصرخ كنت متضايق اوي وعايز انقذ الجسد بس مش عارف انا عايز انقذ الجسد ليه و اعمل ايه

لما بصيت حوليا لقيت الغرفه فيها وجهات زجاجيه نورت واحده من الوجهات دي لقيت مكتوب عليها(وطني)
جريت علي الغرفه دي يمكن الاقي حد يقدر ينقذ معايا الجسد من الراجل السفاح المتنكر في صوره دكتور ده
لكن لما دخلت لقيت الناس جوه فرحانه علي الاخر وبيبصوا علي الجسد من ورا الزجاج وبيهيصوا
واحد مسك ايدي وقالي: تعالي انت عايز ايه احنا بتوع الفكر الجديد
قلت : انت مش شايف الراجل دا بيعمل ايه في الجسد انا عايز انقذه
قال:يابني ده الرئيس بتاعنا يعمل الي يعمله وبعدين احنا بنستفيد من ورا دا كله فملناش دعوه خليك في حالك احسن
بصيت كويس في الغرفه لقيت شويه مخابيل جيوبهم مليانه فلوس والفلوس متعاصه بالدم لدرجه ان الدم معلم في الجيوب من بره
نفس الراجل قالي:يعم كبر دماغك وخليك قاعد معانا هنا دا احنا بنطلع مصايف ببلاش وايام الانتخابات فلوس ملهاش عدد
سيبته وجريت علشان اخرج لقيتهم راحوا مصورني وعملولي كرنيه مش عارف ليه قلت مش عايز الكرنيه دا
رد واحد قالي يعم ابقي قطعه لما تخرج اهم حاجه ضفناك للعدد وخلاص يالا غور انت شكلك هتقرفنا معاك
وانا خارج لفت نظري انهم بيتكلموا زي بعض عاملين زي الانسان الالي
المهم خرجت لقيت الجسد لسه بيصرخ ومع كل صرخه منه حاسس ان قلبي بيتقطع والدكتور لسه بيقطع في رجل الجسد

لما خرجت نورت غرفه تانيه مكتوب عليها( اخوان)
قلت ادخل لعلي اجد عندهم من يخلص الجسد من السفاح المتنكر في زي دكتور ده
المهم دخلت لقيت ناس شكلها غريب منهم الي مربي دقنه ومنهم الي مش مربيها واحد منهم راح مسكني من ايدي وقالي تعالي احنا هنضمنلك الدنيا والاخره
ازاي
امشي وانت ساكت
دخلنا عاند واحد شكله الكبير بتاعهم قعد يتكلم في حاجات كتير وبطريقه لطيفه
قلتله من الاخر انت عاندك حل لانقاذ الجسد من ايد السفاح
قالي دا انا الوحيد الي عاندي الحل وقعد يرغي في حاجات غريبه ومقدرش يقنعني باي حاجه حاولت امشي لقيت الباب مقفول
سلمني لواحد قعدني علي جهاز كمبيوتر شكله غريب ووصل سلوك في دماغي (معرفش ازاي دا حلم) شغل الجهاز حسيت ان دماغي هتنفجر وفجأه الجهاز قعد يزمر تيت تيت تيت
دخل الكبير بسرعه في ايه رد عليه واحد قاله الجهاز مقدرش يسيطر عليه علشان هوعانده عقل و بيفكر
اول مقاله كده حسيت ان عنيه كبرت لدرجه انها واخده نص وشه وراح شايلني من علي الكرسي ورماني في الارض وضربني بالشلوت جامد لدرجه اني اخترقت الباب وخبطت فالسرير الي نايم عليه الجسد الي لابس علم مصر
الجسد لسه بيصرخ والسفاح لسه بيقطع فيه قلت احاول اعمل حاجه بنفسي رحت للسفاح قلتله حرام عليك الي انت بتعمله فيه لكن حسيت انه مش سامعني

بصيت لقيت واحده من الوجهات الزجاجيه مكتوب عليها(معارضه)
دخلت علشان انا حاسس ان حياتي مرتبطه بنجاه هذا الجسد من ايد السفاح بس الي شفته غريب
لقيتهم متقسمين لمجموعات والوان مختلفه
ناس لبسين برتقالي وناس لبسين احمر والوان كتير والي لابس زي بتوع الوطني والي هدومه ملهاش لون بتتغير كل شويه حسب الموقف
كل مجموعه واخده جانب وافردها بيتكلموا مع بعض
لفت نظري ان اغلبهم عواجيز وفيهم ناس راسها شبه راس الانسان البدائي
والغريبه ان فيهم ناس قاعده تهلل وتشجع زي الي شوفتهم في غرفه الوطني(مش عارف دول ايه جابهم هنا)
لفت نظري اكتر مجموعه من الشباب قاعدين في الركن ظاهرين اكتر من غيرهم عاندهم حماس افكار جديده حسيت انهم خليه من النحل
حصل حاجه غريبه الباب اتفتح وواحد اترمي من بره شكله واخد علقه موت رماه واحد لابس بدله سوده اول ما اترمي لقيت ناس منهم قاعده تضحك بهيستريا
اتنين شالوه وحاطوه جانبهم
لقيت ناس بتتكلم(يستاهل_مبيسمعش الكلام)
واحد وهوا معدي بيتفرج عليه ضربوا بالرجل -وواحد تاني طلع موس وعوره من غير ما حد ياخد باله-وواحد راح مطلع قلم وغرزه في قلب الراجل المصاب
قعدت اصرخ انتوا بتعملوا كده ليه محدش رد
فضلت اعيط علشان اول ما دخلت الغرفه دي حسيت ان دول هما الي هيخلصوا الجسد من ايد السفاح
حاولت اخرج لقيت كل واحد بيشد فيا (تعالي اقعد هنا)هما بيشدوا فيا وانا ارفان منهم حاسيت اني انهزمت نفسيا بعد ما قبلت الناس دي
خرجت جري بصيت علي الجسد لقيت الوضع زي ما هوا السفاح بيقطع في الجسد و الي اتغير اني اصبحت اضعف- قوتي بدأت تنهار حاسس بالم رهيب في قلبي من الي انا شايفه بيحصل في الجسد

بصيت لقيت غرفه موجوده مكتوب عليها (الشعب)
وانا مكنتش واخد بالي من الغرفه دي علشان الناس الي فيها كلهم نايمين
لفت نظري في الغرفه ان فيها سحابه سوده مخليه السقف مش باين ايه الي جابها هنا مش عارف
جريت دخلت الغرفه دي لقيتها مليانه لكن مفيهاش صوت مش عارف الناس الي فيها نايمين ولا ميتين اهز فيهم شمال ويمين مفيش اي رد فعل دلقت عليهم جردل ميه -مفيش استجابه
واحد منهم بصلي وقالي يعم خدلك ركن نام فيه انت مبتفهمش-خخخخخخخخخ
اعمل ايه مش عارف
لقيت واحد بيتقلب رحت قلتله اخيرا لقيت واحد صاحي-قالي مين الي صاحي انت بتحلم انا نايم من ايام الهكسوس -خخخخخخخخ
جبت مكرفون وقعدت اتكلم فيه وكان الرد-خخخخخخخخ
معرفش لقيت واحد دخل رمي صباع دناميت وبوم
انفجر الدناميت وحول ناس منهم لاشلاء لكنهم لسه نايمين لدرجه ان واحد مش باقي غير راسه ولسه نايم
حسيت اني هتجنن لقيت واحد بيبصلي -قلتله-انت صاحي
قال -اه- قلت- متعمل اي حاجه قال – وانا مالي
قلت- وانت مالك ازاي انا كل ما بيقطعوا في الجسد ده بحس انهم بيقطعوني انا
قال- ما انا عارف اصل الي بيقطعوه ده مش شخص دي بلدك بص علشان ترتاح خدلك جانب ونام ولو مش عارف تنام اعمل نفسك نايم احسن
قلت- طب ايه السحابه السوده الي خنقتني دي جت منين
قالي-السواد ده خوف من كتر ما الناس اتنفست خوف السحابه اتكونت وبقت هيا المسيطر علي افعلهم
لقيت الباب اتفتح واترمي منه واحد قعد يصرخ من الالم رحت جري عليه مالك-خخخخخخخخ
رجعت للي كنت بكلمه-بقولك ايه-خخخخخخخخخ
خرجت ومسجلتش اسمي عندهم لاني لقيت اسمي مكتوب

لما خرجت لقيت الجسد الي عرفت انه بلدي بيتحرك-ظهرت ابتسامه علي وجهه رفع راسه وبص علي الغرفه الي مكتوب عليها الشعب لكنه اول ملقاهم زي ما هما راسه وقعت علي السرير مر تانيه واتخبط واتفتحت راسه وحصل نزيف شديد
صرخ الجسد صرخه رهيبه بس مش عارف الصرخه دي من الامه ولا من حسرته
جري السفاح علي الجسد ومسك الشاش وقعد يربط في رجل الجسد
ايوه ربط رجل الجسد والرأس بتنزف بشده والدم بقي للركب
ربط الرجل ومشي ولقيت المساعدين بتوعه بيهنوه وبيباركوا علي الانجاز الكبير وسمعت اصوات فرح وهيصه جايه من غرفه الوطني وبعض الناس الي بيهللوا من المعارضه
مفيش حل انا جريت علي السفاح وقعدت اصرخ واهز في السفاح لكنه بص وقالي (طير انت)
لقيت نفسي صحيت من النوم ومتضايق اوي علشان السفاح كان اخر واحد شفته قبل ما اقوم من النوم(اصل الشيخ بتاع تفسير الاحلام قالي ان رؤيه الراجل دا في المنام مبيجيش من وراها غير البلاوي ) ربنا يستر